حكايات مسخرون المسخرانى

انا مسخرون المسخرانى شاب مكافح بس بيقولوا على لسانى انه لاسع وانا مش عارف هو لسانى ولا دماغى اصل من كتر المرمطة على لقمة العيش الواحد مبقاش دارى ودماغى مليانة بمواقف وحكاية ياما
اول حكاية
انا وفى اخر سنة فى الكلية اه اصل انا واد يعرف قيمة العلام وشهادته شوفت حتة بت صبية بس حكايه تخطف العين والقلب متقلش جنية
المهم اتمسحت فى فلان وفلانة لغاية لما وصلت لها وتقربت لها واتعرفت عليها وعرفت ان امها معلمة متريشة من معلمات الشادر
قلت فى نفس بالى هى دى ياواد يامسخرون طاقة القدر اللى بصح وصحيح وتشلنى من اللف على كعوب رجليا انا وبلم الاقساط بتاعت الست سنية
المهم علشان مطولش عهليكم فى الكلام انا بلفة الصبية وقلت ياواد دى الطبخة استوت مبقاش غير امها المعلمة المترشة اللى عايزة دخلة بس تكون اللى هى وابقى ضمنت البنية
غنيت على البنية علشان تضغط وتساعدنى وماترفضش وانا محلتيش اللضا وراسم على فلوس الولية علشان اسيب عشة الضنك واقب على وش الميه
ورحت اقابل الولية وياريت ماروحت ولا اتهببت
طلعت المعلمة ولية لسانها زالف زى الترماى اللى بيدهس على القضبان اتاريها اطقست عليا وعرفة الفولة وخدتنى على الحامى غسيل ومكواة وهب رمتنى وقلتلى مايلزمناش من الصنف يادالعععععععععععععععععععععععععععدى
ودى كانت اول حكاية

بداية السلم
انا كنت بشتغل مع الست سنية بعد الثانوية علشان طموحى ان اخش كلية والاقى وظيفة عليها القيمة وابنى حياتى وابقى زى بقية الخلق اللى الواحد بيشوفها ويسمع عنها بس اللى كان يهمنى ان اعيش عيشة كويسة ويبقى لى بيت
المهم اشتغلت عند سنية العنوسة اللى فاتها القطر ومعداش عليها وهى لغاية دلوقتى فاكرة نفسها صغنونة
والست سنية وارثة دكان ادوات منزلية عن المرحوم ابوها وهى ذودته شويه قول شويتين وركبت موجة التقسيط المريح اللى بيزغلل عين الصغير والكبير وهى بتلم من وراه فلوس كتير بتفكيرها اللائيم
حتى لما جيت اقدم فى التنسيق كان مجموعى يدوب يدخلنى حقوق اوتجارة قالتلى خش تجارة ياخشيم واهو انتى استفدت من الشغل هنا وشغل الدفاتر فوافقت واقتنعت بالكلمتين اللى قلتهم ودخلت تجارة
ومرت السنين واتخرجت وخبطت كل الابواب علشان اخلص من شغلانة الخبيط على الابواب للم القسط من فلان وفلان وحالى هو زى ماهو مفهوش تغير وانا قاعد فى حجرة السطوح فى حتت بيت مهجور مفهوش غير مسخرون المتعوس
وفى يوم من الايام ساعة الصبحية وانا راجع الدكان ومعايا سندوتشين الفول والطعمية لقيت الست سنية واقفة ادام المرايا بتتعايق ولا اصغر صبية فصبحت عليها ولقتها بتقول ياخسارتك ياسنية يابت ياصبية ده الشباب اتعمى اللى ميشوفش دى البنية قلت فى سرى ايه ده ياولية انت فاكرة نفسك بنية وانتى يادوب مش محصلى ربع بلطية
فبصت عليا وقالتلى ايه اللى معاك قلت لها ده فطارى جبته اكله فى الدكان ردت وقالت ده معرض ياعنيا
وهنا لعب فى دماغى الشيطان وقلت هى ولية وفاضل على العمر تكة ومحدش هياخد المكان لان مفيش ودا ولا انسان وفيها ايه لما اتودود لصاحبة المكان يمكن ابقى صاحب المال والجاه
ومن هنا بدات رحلتى تفكيرى نحو الصعود وكانت سنية هى فكرتى لاول سلمة

حكايتى مع سنية
انا لما اشتغلت على سنية حكم اخوكم استاذ ورئيس قسم فى الاغنية والموال اللى توقع احسن قلب وتخليه ولهان بدات سنية تحن وخصوصا انهامحرومة من الدندشة والدلع وبدا الخير يظهر ويبان واخوكم بدا يتانتك ويدلع نفسه ويشبرقها شوية وفى نفس الوقت اتلميت على الواد جميل اللى كان معايا فى الكلية بعد معرفت انه شغال فى شركة البورصة قلت ياواد انا فيها من غير محد يحس ولايدرى
وبدات البلية تلعب وانا اخد القرش على القرش واشيله واتنى ماشى فى سكة الدلع مع سنسن والاشية معدن وهى سابتلى الحاجة وانا اتصرف زى ماانا عايز وهى اهم حاجة عندها تسمع الكلام المعسول والغندرة وانا شغال بلم فى حالى علشان اول ماقب اقول يافيكيك
لكن بعد فترة بدات نغمة سنية تتغير وتسال احنا مفروض نتاهل يامسخرون وهى البعيدة نسية انها يدوب بينها وبين القرافة شبر ويظهر ان اولاد الحلال كتير فوقوها وقلبت عليا وخصوصا لما قلتلها انى لسه بكون نفسى قامت شايطة فيا وطردانى شر طردة

تحسين العلاقة

قعدة حائرا اضرب اخماس فى اسداس ماذا افعل وانا يدوب البلية بدات تلعب معايا فى اولها من القرشين اللى قلبتهم من سنية وبقلبهم فى البورصة ومش عايز العب فيهم لغاية لما يبقوا خميرة كويسة اعملى ىسبوبة حلوة تاكلنى بغاشة بدل من السميط ابو دقة

فقلت ياواد ارجع لسنية وهشكها شوية ببوقين حلوين

خليها تحن وترجع الميه لمجاريها اهو اللى يجى منها احسن من مفيش لغاية مانقف على رجلينا

وماصدقت هدانى تفكيرى ورحت جرى جايب نص كيل بسبوسة وعلبتين عصير وراجع عليها فى المعرض

قابلتنى مقابلة ناشفة بس على مين ولانى قمت واخدها فى طقم كلام حنية ومدادية وهى بدات تخش تحت باط الحنية وقلتلها اهون عليكى تشرشحينى ياسونسن وانا اللى بدوب فى هواكى ودخل عليها الكلام وعفت عنى سنية وبدات الاغيها واتدندشها وهى تغمرنى بحنانها الملئ بالبهاريز النقدية علشان احسن مظهرى وابقى عليا القيمة حسب الاسطوانة المتينة اللى عليها بسحب من مخزون حبها فلوس بشغلها

وكل ده حصل قبل

نكمل بعد الفاصل على راى ابومروان ونبقى نواصل

الهروب من سنية

بدات سنية تحس انى باسحب منها مبالغ كتير وبدا الفر يلعب فى عبها واحنا وقاعدين بنتساير وبقولها والله ياسنسن احنا عايزين نعمل شوية توسعات ونزود شوية البضاعة وخصوصا الاجهزة اللى عليها الطلب ردت عليا وقالت والله يامسخر احنا فى موضوع اهم مفروض نتكلم فيه علشان بعد كده نعرف نظبط حياتنا قلتلها موضوع ايه قالتلى موضوع جوازنا اهو احنا عمالين ناجل فيه بس مينفعش يتاجل تانى وخصوصا ان احنا مش هنحتاج حاجة الشقة موجودة ومفروشة مش هنعوزغير الماذون والشهود

رديت عليها وقلتلها سيبك من الموضوع ده دلوقتى قلتلى لا هو الاهم ولازم اعرف انه هيتم ولا انا كنت صيدة تلهف من وراها القرشين وتفلسع واهو وش الضيف بعد ماكلتلك البلوبيف ورفعتك من على نومة الخيش

رديت عليها وقلتلها مالك ياسنية هو انتى فاكرة نفسك لسه صبية ده انتى عديت الخمسين بشوية وانا تحت الثلاتين ياعنيى

واتصدمت سنية من الرد

وخرج مسخرون بعد ملهف الولية

قائلا انا اعيش ندلا ومتريش ولا اعيش جوز الست المتيس