الامسية الرابعة من حكاوى المصطبة

كالعادة اليومية تجمع اهل المصطبة مساءا حول الحكيم حسان ليتسامروا فى الحكاوى

الْخَالَة بْهَانَة: شوفتوا اللى حصل العيال بتوع الجامعة عملوا مظاهرة عايزين يغيروا الدستور

دستور ايه ياحكيم

الْحَكِيْم حِسَان: الدستور ده القانون اللى ماشية عليه البلد ويتم اختيار الريس اللى يحكمها

الْحِكاى: طب ماهو فيه ريس بيحكمنا

ولا هما مصدقوا الراجل عمل عملية والكل عايز يلعب بديله

الْخَالَة بْهَانَة: ده اللى اسمه ايمن نور اللى كان فى السجن بيقول انه هيرشح نفسه

هو القضية بتاعته خلصت وطلع براءة

الْحِكاى: لا ياخالة دى لسه شغالة

بس هو تلاقيه عامل انها هتخلص وياخد براءة

الْخَالَة بْهَانَة : يعنى مفيش غير اللى اسمه البرادعى

وياعينى امبارح مبهدلينه فى الجرنال ال ايه عاوز يلغى الفلاحين والعمال والريس بتاع العمال مبهدل الدنيا وبيقول عليه مبيفهمش حاجة

الْحَكِيْم حِسَان: اهو الكل عمال يتسابق ويخبطوا فى بعض

والريس سايبهم براحتهم ومحدش عارف هو بيفكر فى ايه

وكا لسان حاله بيقول سبهم على بعض هما هيشوه سمعة بعض والناس تعرف ان انا او ابنى احسن الموجودين

الْحِكاى: يَعْنِى يَاحَكِيْم هو قاصد كده

الْحَكِيْم حِسَان: الاحداث بتقول كده

الْخَالَة بْهَانَة: يعنى بيقولنا بصحيح العبارة مفيش احسن منى انا او ابنى

الْحِكاى: اهى هانت وكل حاجة هتبان

الْخَالَة بْهَانَة: بس الحكومة منعت بتوع ابريل دول وضربتهم علشان يمشوا وميطلبوش اللى هما كانوا بيقولوا عليه الغاء القانون الطارئ

الْحَكِيْم حِسَان : قصدك قانون الطوارئ

مهما عايزين حاجات كتير تتغير

زى الغاء القانون وتعديل 3مواد فى الدستور

ومحدش سال فيهم

الْحِكاى: بيتهيائلى ياحكيم محدش هيسال فيهم

وبقوا عاملين زى المغنواتى اللى بيغنى لمجموعة خرس

وفيه مجموعة هتيفه عمالة تشتم فى كل واحد شويه ومش محددة هى مع مين

الحكيم حسان: لان دول هما المستفيدين ولا عايزين دول ولا دول علشان مصالحهم متضرش لانهم مستفيدين كده

ولسه ياما هنشوف لغاية مايجى الوقت اللى لازم يطلع واحد من قلب الناس يكون حاسس بيها ويقول لازم نتغير ونكون ايد واحدة وقلبنا على بعض ويوافقوا الناس ويتحدوا وياخدوا بايدوا ويساعدوه على التغيير

لكن احنا دلوقتى لسه متفرجين ومحدش مننا متحرك

ربنا يهدى ويصلح الحال

اشوفكم بكرة على خير