من حكاوى المصطبة الامسية الاولى

مجموعة من الحكاوى التى تحدث داخل المجتمع ومرتبطة بنا

كان بسطاوى الحكاى بائع سريح بعربية خضار يطلع من الفجرية ولايعود الابعد ان يشطب ماعلى عربيته من انواع الخضار
وكان مشهور بخفة دمه وتجاذب الكلام مع الصغير والكبير وكان الكل ينتظر مروره للمناكشة والضحك معه
وكان بعد عودته من عناء اليوم يجتمع امام منزله على مصطبة عمه حسان الملقب بالحكيم لنظرته المتدققة فى الكلام ومعرفته بتحليل الامور لذلك سمى نفسه الحكيم حسان
وكان الطرف الاخر للمة المصطبة ولها تاثير قوى الخالة بهانة الدلالة خبيرة البيوت والمتدخلة فى بواطن الامور لكل نساء القرية بحكم دخولها البيوت وانحشارها فى كل كبيرة وصعيرة رغم انف اصحاب البيت

وكانوا يجتمعون يوميا مساءا وامامهم براد الشاى ومعهم كثير من الاخوة والاخوات من اصحاب المكان
لياتى اليهم بسطاوى الملقب بالحكاى بالاخبار والاحداث ولا كانه نشرة الاخبار لكل الوكالات العالمية وهم ينتظرونه بترقب ومعه الخالة بهانة اللى بتعرف تقلب الواد الحكاى فى الكلام

وفى ليلة من الليالى كانوا قاعدين وبيشربوا الشاى حتى بدات بهانة الكلام

الخالة بهانة : سمعت ياحكاى اى خبر عن حكاية البت نرجس بت ام اسماعيل

الجكاى : يعنى انتى مش عارفة الحكاية بتاعت البت المهروشة هى وامها والجوازة دى

امال لو مكنتيش كنتى قاعدة طول اليوم هناك امبارح ومليتى بطنك بالفطير المشلتت اللى كانوا بيعملوه امبارح لمحروس العين

الخالة بهانة: ياواد يامدهول هو انا اقدر اسال بردوا علشان يقطعونى بسنانهم ويقولولى انتى ايه اللى حشرك ياحشرية انا اسمع بس واطيب الكلام غير كده لا

الحكاى: ياستى الحكاية ومافيها انتى عارفه الراجل اللى شغال عند عم فتوح فى المطبعة على المكنة اللى حلته فى الورشة

الخالة بهانة: عارفاه مش هو اللى بيعمل الكروت بتاعة الفرح

الحكاى :ايوه هو ده

ده ياستى بقاله سنة بيروح عند البت نرجس يصلح معاه الاجهزة بتاعت الكمبيوتر معاها

ويظهر كده ان السنارة غمزة بينهم من كتر القعدة مع بعض

فقال لها انه عاوز يتجوزها والبت موافقة واقنعت امها بكده

الخالة بهانة: يخيبها بت ده متجوز ومعاه عيال

الحكاى : ايوه استنى ماهو انا جايلك فى الكلام

طبعا اخواتها البنات لما عرفوا بهدلوا الدنيا علشان عارفين انه متجوز ولما اتكلموا مع امهم بهدلتهم وقالت لهم انا هجوزها بدل ماهى قاعدة كدا خليها تلحقلها عيل لحسن اختكم كبرت وركبت دماغها وقالتلهم اللى مش عاجبه يخبط دماغه فى الحيط

والولية مصممة على الجوازة

الخالة بهانة: هيتجوز ازاى المدهول ده وهيعمل ايه مع مراته وعياله

الحكاى: ماهو المشاكل جايا من هنا مع البنات اخواتها والسبب

ان المحروس بسلامته شارط على البت وامها ان هيتجوز من غير مراته وعياله يعرفوا وهو هيظبط الامور دى مع الماذون

وكمان الانأح من كده انه شارط انه مش هيبات ولا ليلة يعنى تواجده كل بالنها وكانه فى الشغل

الخالة بهانة: وموافقين على ده كله

الحكاى: ايوه موافقين ومش هامم الوليه زعل بناتها اللى ملهاش غيرهم ومصممة على الجوازة هى والبت

الخالة بهانة : ايه ياحكيم ساكت ليه

الحكيم حسان: باسمع واقول عجبت ليك يازمن فى بلدنا واحدة هتتجوز جواز المسيار

الحكاى: جواز مسار ايه ياحكيم دى البنية هتتجوز على سنه الله ورسوله

الحكيم حسان: ماهو ياخشيم ده جواز بس طريقة الواد اللى هيتجوز بها بيقولوا عليه الاسم ده ليه بقى

الحكيم يقولوك علشان تتنوروا وتعرفوا

ان الراجل بيتجوز ويشترط عليها انه هيروح عندها لما يعوز وهى بتكون قاعدة فى بيت اهلها وملهوش دعوة بيها

واهى البنية معاها الدكان بتاعها بتاع الكمبيوتر وهو واكل شارب نايم مبسوط ومتجوز ومحدش عارف عنه حاجة

ودى كانت اول حكاية من حكايات المصطبة

وراى الحكيم اللى خلى الحكاى والخالة بهانة مبلمين مش عارفين معنى كلام الحكيم اللى بيقولوا وهو عمال يعيد ويزيد وفى الاخر قالهم قوموا ناموا يامبلمين