من اول السطر

من اول السطر اللى عايز يتعلم مع الست مفيدة هيكون استاذ من الاساتذة وممكن يتبعت رحلة مكوكية الى عنبر العقلاء طبعا انتم عارفين مكانه فين

وتعالوا نتعايش مع الست مفيدة واحوالها اللى متسرش عدو ولا حبيب

***************

***********

*******

كان يا ما كان فى الحكاوى فى قاعدة الستات اللى بيجبوا اخبار كل الجيران ويمكن كمان اخبار الدويلات المجاورة للمكان اصل الفضى بيولد فرلغ خيال خصب يصدقه اى عقل لان كلامه بيكون متركب على بعضه وكئنه حصل بالتمام والكمال

الست مفيدة اللى بتعتبر نفسها مفيدة لكل الناس بارائها الجهنمية حتى لو خربت من البيوت ميه

سمعت ان البنت دلال بنت ام حسين هتتجوز الواد حسن العجلاتى ابن ام حسن اللى ساكن على ناصية الشارع البيت اللى على اليمين جمب زير ام سمير اللى بتشرب منه الست مفيدةلانها ساكنه فى البيت اللى جمب الزير ومتعوده كل متعطش تنادى على حسن العجلاتى علشان يعبلها الكوباية  وميقدرش يتاخر لانها ممكن تشرشحه وتفرج عليه امه الحارة والحوارى المجاورة لحد بولاق امال دى الست مفيدة

اول ما سمعت  الست مفيدة الخبر نادت على حسن العجلاتى بصوت عالى من الشباك اصلها ساكنه فى الدور الارضى وقالتله بردوا ياواد تروح تتكلم على البت المفعوصة بنت ام حسيناللى لسانها متبرى منها ومتاخدش رائ انت مش عارف ان خابزة وعاجنة كل كبير وصغير فى الحارة دى

رد عليها حسن العجلاتى وهو خايف وبيقول فى سره استر يارب لحسن تتقلب جنازة مش جوازة وقالها الجواز قسمة ونصيب ياخالة مفيدة وانا افتكرت ان امى اتكلمت معاكى وقالتلك

وهنا الست مفيدة عملت نفسها انها عارفة وردت قالت لا هى لمحتلى على الموضوع وانا قلتله ده عايز قاعدة علشان الامور تكون واضحة والبت المفعوصة دى اصل شايفه نفسها شوية ولازم تخليها واقفة على اول السطر متحودش عنه لان لو خطك عوج مش هتعرف تعدل السطر ابدا والاستيكة بتاعتك هتبقى ماسخة لانها مبتنضفيش كويس

رد حسن قالها سطر وعوج ياخالتى انا مش فاهم حاجة ياخالتى

ردت وقالتله امشى يا واد باين عليك هتفضل ابن امك لخمة على طول

اللقطة الثانية

ـــــــــــــــــــــــــــــــــــ

الست مفيدة مع دلال

ــــــــــــــــــــــــــــــــــــ

قعدت الست مفيدة وهى بتكلم نفسها الواد وقع ومحدش سمى عليه ايش قدره على البت دلال المنحنحة والميصة وشايفة نفسها يا هنا ياما هناك ما احنا كنا بنات ومعملناش اللى بتعمله المضروبة دى

وهى وقعدة عماله تضرب اخماس فى اسداس ازاى تروح عند ام حسين علشان تتقص على الموضوع وتعرف تفاصيله وتيقى عضو اساسى فى المشورة  والا  ذنبهم على جنبهم ولسه هتقوم من على الكنبه سمعت صوت بينادى عليها ياترى مين

الست مفيدة : تصدقى انت بنت حلال مصفى لسه بقول واحشانى موت وكنت لسه هاخد الملاية  من الاوضة وهجيلك

ام حسين : القلوب عند بعضها يا ختى انت جيتى على بالى الصبح اول ما صحيت من النوم وعلى الفطار قلت للبت دلال يامين يبعت لخالتك مفيدة تفطر معايا ملقتش حد اشيعهولك قلت مبدهاش انا اخد الفطار واروح افطر معاها هناك ويابت لو عايزة تفطرى معانا ابقى حصلينى بس متتاخريش

الست مفيدة : بنت حلال عارفاكى ياختى ربنا يخليكى ويبعد عننا ولاد الحرام

ام حسين: ايوه ياختى ادعيلنا يكفينا شرهم

الست مفيدة : انت جايبه ايه معاكى يا ام حسين

ام حسين: جايبة فاضلة خيرك طعمية وفلال وبطانجان مخلل

الست مفيدة : طب استنى ادى صوت للواد حسن يجبلنا فول وربطتين بصل اخضر

الست مفيدة: تنادى على حسن وتقوله ايه ياواد تروح تجيبلنا فول وبصل وهفطرك فطار عمر ما امك اكلتهولك

حسن: فطار ايه ده ياخالتى اللى اغلى من اللى  امى تعمله امال لو مش عايزة فول وبصل انا قلت هتقوللى فطار زواتى زى بتوع التليفزيون

الست مفيدة: المهم مش فى الفول يا واد المهم فى اللى هتعمل الفول واللى هتاكل معاهم الفول يا واد

حسن : ليه ياخالتى هو انا هاكل الفول مع الست بديعة

الست مفيدة : بديعة مين يا واد ده انت لو عرفت هتروح فرريرة تجيب الفطار وكل اللى هتلاقيه علشان الجميل يرضى عنك

حسن :هى خالتى ام حسين هى الى هتفطر معاكى

الست مفيدة : مش هى لوحدها يادهول

هتروح تجيب الفطار

حسن: واللى انت تقولى عليه ياخالتى

الست مفيدة : ياسلام يا خويا يا منحنح لما اشوفكم انتم الاتنين على الفطار هيحصل ايه بس بسرعة يا بن امك

اسمع يا واد اوعى تعدى على امك وتقولها لحسن مش هيبقى فطار

اللقطة الثالثة

ـــــــــــــــــــــــــــــــــــ

الست مفيدة: هو الواد حسن اتاخر ليه ده عم سيد بتاع الفول على ناصية الشارع مش بعيد علشان يتاخر

ام حسين : الغايب حجته معاه

الست مفيدة : لا ازم ابص عليه علشان اشوف الواد ده حكايته ايه دى مش عوايده

ام حسين : زمانه جاى يا مفيدة متتعبيش نفسك

الست مفيدة : شوفى الواد والبت قاعدين بيتسامروا ادام البيت و كئن مفيشى حد مستنيهم وهيموتونا من الجوع

ام حسين : الواد والبت مين ياختى

الست مفيدة: البت دلال والواد حسن

انت ياواد يلا وابقى كمل حكاويك بعد ماتجيب الطلبات اللى معاك

حسن : حاضر ياخالتى اصل عم سيد كان عليه زحمة شوية وهو اللى اخرنى

الست مفيدة : عمك سيد هو اللى اخرك ياواد هو انا باكل من الكلام ده

ده انا مفيدة ياواد مش امك الهبلة اللى يدخل عليها الكلمتين الهجس بتوعك دول

حسن : لا والله ياخالتى  حتى اسالى دلال انا قبلتها ادام البيت وقلتلها خدى الحاجة دى معاكى

الست مفيدة: ليه مش هتفطر معانا دى دلال اللى هتعمل الفطار

حسن : لا يا خالتى كلوا انتم بالهنا والشفا انا هاروح اشوف شغلى علشان فى ناس مستنيانى

الست مفيدة : خلاص هنشيعلك كام سندوتش مع دلال اهو بردوا يرموا عضمك

ام حسين : يلا ياختى دلال عملت الفطار

الست مفيدة: حاضر يا ختى

اسمعى يا بت يا دلال اوعى يابت تدنلقى عليه عففى نفسك علشان يفضل يجرى وراكى ويبقى نفسه تطلى عليه بنظرة

دلال : متخافيش ياخالتى ده انا مابردش عليه وهو فى الرايحة والجاية اول مايشوفنى يجى جرى يبقى عايز يكلمنى وانا بسيه وامشى واقوله عيب ياحسن لحسن حد يشفنى يقول لابويا

حتى دلوقتى انا وجايه قعد ينادى على وانا مردتش عليه لغاية لما جيت ادام البيت قالى انا عايزك تاخدى الحاجة بتاعت خالتك مفيدة علشان كده رضيت عليه

الست مفيدة : ايوه كده يابت خليك ناصحة زى خالتك مفيدة

وانت ابقى عدى على كل يوم علشان اوعيكى واعرفك ازاى تخليه يجرى وراكى

دلال : متخافيش على ياخالتى

الست مفيدة : اه ما نا عارفة هو انتى هتقوللى يا بت

ام حسين : قصدك يا مفيدة

الست مفيدة : لا يا ختى ده انا عارفاه ناصحة زيك ومحدش يقدر يضحك عليها

ام حسين : اه اصل عقلى خدنى لحاجة تانية

الست مفيدة : ولا تانية ولا تالتة يا ختى

دى بنتك متربية وملهاش فى حاجات البنات اللى بنسمع عليها

ام حسين : ايوه ياختى ده احنا بنسمع بلاوى ربنا يسترها

الست مفيدة :على الجميع ياختى

بس قوللى انتم اتفقتوه معاه على ايه لحسن تكون الوليه امه استقوت القلب عليكم ولا حاجة

ام حسين : لسه ياختى متفقناش على حاجة هما جم طلبوا ايدها من ابوها ووافق

الست مفيدة : ازاى يا ختى متتفقوش على حاجة ده جواز مش لعبة

ام حسين : اهو ده اللى حصل

الست مفيدة : لو عايزانى يا ختى اروح واتكلم معاهم وكئنكم متعرفوش حاجة  واقولهم انا جايه ابارك واخلى الكلام يجيب بعضه انا تحت امرك

اصل انت متعرفيش غلوتك عندى والبت دلال دى بنتى الغالية ولازم ندور على راحتها

ام حسين : عارفه والله ياختى بس لازم اشور على ابو حسين الاول وبعدين ارد عليك

الست مفيدة : وانا تحت امرك يا ختى انت بس قولى وانا هتصرف واعرفلك كل حاجة وهما هيتكلموا معاكم فى ايه علشان تبقوا عاملين حسابكم بدل ما يفاجئوكم بطلباتهم وابو حسين طيب ممكن يوافق ويورط نفسه

اصل انا عارفاها ام حسن مايهونش عليها وتحب الناس هى اللى تجبلها كل حاجة

اسالينى انا عليها

ام حسين : خلاص ياختى هقول لابو حسين وارد عليكى لحسن انت كده وغووشتينى من ناحيتهم

الست مفيدة : متخافيش ياختى انا معاكى فى اى حاجة متشيليش اى هم

ام حسين : اله يخليكى ياختى هسيبك انا يلا يابت يادلال لحسن نتاخر على تجهيز الاكل لابوكى واخواتك

الست مفيدة : مع سلامة انا فى نتظار اشارتك ياختى مع السلامة

وسلمى على ابو حسين

.....

بعد الإفطار وماشية أم حسين وبنتها دلال قعدت الست مفيدة مع نفسها وهى بتردد ايوه كده يابت يا مفيدة لازم ولابد الكل يعرف إن مفيش موضوع يتم إلا لما يمر من تحت ايدى واهي دلوقتى أم مقصوفة الرقبة هتقعد مع جوزها يضربوا أخماس في أسداس وهيبعتولى ومن هنا هبقى أنا الأمر الناهي في الجوازة دى

أم حسين : اسمعي  يا دلال هو الواد حسن أتكلم معاكى في حاجة يا بت وأنت محكتنيش عليها

دلال: ليه يا مه بتقولي الكلام ده

أم حسين : أصل الولية الارشانة وغوشتنى  وركبتنى الخفيف

دلال : ماهو أنت اللي قلتلها انك متفقتيش معاهم على الحاجة وأنت عارفاها لازم تحط مناخيرها في اى موضوع ومفيش موضوع دخلت فيه الا وخربته وقفلت ببانه بالضبة والمفتاح يعنى ملهوش اى رجعه او علاج

ام حسين : ماهو انا رحت عندها علشان اتقى شرها لانها مش هتقعد ساكتة و هتقعد تشنع عليكما والعيار اللى ميصبش يابنتى بيدوش ويصيب اثر

دلال : متخفيش يا مه حسن شارينى وبعدين هو مستعجل على الجواز

ام حسين : خلاص لما يجى ابوكى هخليه يرد عليهم ويحدد معاد ويقولهم ميعرفوش حد

بعد عدة ايام الزغاريد تدوى فى الشارع

الست مفيدة :هو فى ايه فى الشارع انا سامعه زغاريد هو فى حاجة حصلت وانا معرفش

الست مفيدة : انت يا واد يا واد رد هو فى ايه مين اللى بيزغرد فى اخر الشارع

الواد : انت متعرفيش ياخالتى

الست مفيدة : اعرف ايه يا واد

الواد : معقولة متعرفيش ان الاسطى حسن بيتجوز النهارده

الست مفيدة : بيتجوز ومحدش يقولى

بقى كده يا مفعوصة  ان تحدد الميعاد وتتفق وانا معرفش وال انا مستنية علشان تبعتلى

الواد : بتقولى حاجة ياخالتى

الست مفيدة : بقول غور جاتك داهية تلمك انت والشارع باللى فيه سديت نفسى

....

ودى كانت نهاية السطر بالنسبة للست مفيدة

وبنقول ان للبيوت اسرار لايجب التدخل فيها

الا اذا اذن اصحابها لطلب المشورة الخالصة او المساعدة